أخر الاخبار

الدومري علي فرزات يكشف لأول مرة أسرار صدور أول صحيفة مستقلة في سوريا بأذن من بشار الأسد

الدومري علي فرزات يكشف لأول مرة أسرار صدور أول صحيفة مستقلة في سوريا بأذن من بشار الأسد





كشف رسام الكاريكاتير العالمي علي فرزات أسرار صدور أول صحيفة ناقدة ساخرة في سوريا بأسم " الدومري " وقال علي فرات في منشور عبر حسابه في فيسبوك .

و"الدومري" هو اسم جريدة أصدرها الفنان فرزات عام 2000 كأول صحيفة خاصة في سوريا منذ عام 1963 والأولى في عهد بشار، إلا أنها أغلقت بناء على قرار وزير الإعلام الأسبق عدنان عمران رقم 6061 الصادر في 31/7/2003 بحجة "مخالفتها لقانون المطبوعات وبالتالي منع أي مطبعة من طباعة صحيفة الدومري".، والمفارقة باستخدام نفس الاسم في مسلسل يُعتبر القيّمون عليه من المواليين لنظام دمشق...



انا شاهد عيان
كل شي بتقرأوه اليوم هو مجرد مقدمة اما الدخول بالجد بيبلش بكرا
لسه السهرة من اولها خللينا نحكي شوي عالمكشوف رح بلش من البداية للنهاية باقل حكي ممكن واللي بدي قوله قبل مانحكي عالغريب بدنا نحكي عالغربان الاوباش بقصد دود الخل مننا وفينا .!؟ لذلك كل شوي بكتب فقرة وبضيفها لهاد البوست تابعوني.

1-في سنة 96 اتفاجأت بزيارة بشار لمعرض كنت عامله في المركز الثقافي الفرنسي وكان المعرض مجموعة من اللوحات الكاريكاتيرية الناقدة الساخرة واللي كانت ممنوعة من النشر لانها كلها حول المخابرات والقمع والاعتقالات وكنت اتناول شخصية عسكرية قمعية ترمز لحافظ الاسد(بالمناسبة بين قوسين في هديك الفترة وقبل الثورة كان الرمز مبرر لاجل التحريض) مو بعد ماطبشنا الجرة براس النظام.؟

 ههههههههه المهم مو هاد حديثنا وا نا بالمعرض واذا بمجموعة من اشخاص بطقومة رمادية طحشوا عالمعرض وبيناتهم واحد طويل عرفته من الصور بانه بشار (يتبع بعد شوي لبين مااعمل قهوة)اي وين وصلنا؟؟ اي لقيت بشار جايي لعندي وانا واقف جنب اللوحات وطلب مني اشرح له الرسومات بس بيني وبينكم اتلبكت لانه شو بدي قول له هي الرسوم عن ابوك وعن المخابرات ؟؟ وبسرعة طلعت معي وقلت له اعتبرني انا فايت متلكم عالمعرض يعني ماني علي فرزات ورح نشوف المعرض وكل واحد يفسر الرسمات على كيفه ؟؟ واتطلعت بعيونه لقيت عينه اليسار بترجف بحالة عصبية دائمة مع ضحكات متقطعة وكات يتطلع على ضابط امن جنبه عرفت بعدين بانه بهجت سليمان صار يقول له ليك ليك هي الصورة عليكم هههه ههههه هههه اتطلعت بوجه بهجت سليمان لقيته مابيتفسر وغبنها عالسكت لكن خبى لي ياها بعدين.!

 قبل مايخلص زيارة المعرض مشي شوي لقيته ترك القطيع اللي معه وقال لي بصوت واطي بكرا الساعة 5 ضروري شوفك بمكتبي قلت له طيب ماشي بس مابعرف وين المكتب قال لي انا ببعت لك الشفير بيجيبك وفعلا اجا شخص ووصلني لعنده على مكتبه بالمهاجرين فتت لعنده وكان لابس لبس عسكري وبوط عسكري وكان برتبة رائد قعدت على كنباية من جلد اسود وقعد جنبي وقال هي الكنبة كان من يومين قاعد عليها رفيق الحريري !؟ بصراحة مافهمت القصد لكننا تابعنا الحديث حول التطوير والتحديث وحرية التعبير اللي حاططهم بباله وقال لي منشان هيك بدنا نتساعد وننطلق من كل الوسائل وبكل المجالات وقال لي انت فنان معروف والك شعبية لذلك بدي منك شو تصورك للتطوير الاعلامي والفني؟؟جاوبته فورا وبدون تردد انا من رأيي تسمحوا بصدور الصحف الخاصة بعد ماحزب البعث سكرها ب63 وتكون حقيقية وتمارس دور الرقابة عمؤسسات الدولة وهيك بتكون بالمرصاد لكل فاسد وبتقوم بدور الرقيب على اداء الحكومة قال لي متل شو بذهنك قلت بالنسبة الي من زمان وانا عما فكر بجريدة ساخرة ناقدة مستقلة وتكون استمرار لمجلة المضحك المبكي الشهيرة واللي سكرها البعث قال لي طيب شو المواضيع اللي رح تتطرحها بالمجلة ؟ قلت له اول شي بدي احكي عن حزب البعث اللي هو اشبه بمستحاثة متحجرة وتاني شي بدي احكي عن شغلة بيجوز انت مابتعرفها قال لي شو؟؟ قلت له بتعرف لحتى يوصلك كتاب من مستثمر او حدا من البورجوازيين الوطنيين عنده فكرة مشروع ضخم ينعش الاقتصاد بيكون مرق على عشرين ضابط مخابرات ورجال اعمال من عندكم للاستشارة وبيكون هاد الكتاب شفط ملايين الليرات تنحط بجيوبهم ليوصل لعندك قلت له ولسه بدي احكي عن القضاء طبعا بالوثائق اذا توفرت وبدون تحامل على حدا لانه هاد قضاء وقدر مو قضاء !!؟قام قال لي وضيف الهم مجلس الشعب؟؟ ولله هاد كلامه !!

 بيني وبينكم كنت بدي قول له مو انتوا اللي بتعينوهم؟؟ بعدين سكتت قلت لحالي مابدي تقلها من اول جلسة ههههههههههه (ينبع)استغرقت الجلسة حوالي 3 ساعات وكل شوي كان يفوت ضابط مدني بدون اسئذان يفوت خطوتين يعمل حاله عما يجلس مزهرية او يزيح كرسي ويظبط البرداية ويطلع التفت بشار وسألني اصبح اعمل العدد صفر وخللينا نشوفه لانه في قانون عند الوالد رح يصدر بسماح اصدار الصحف والمطبوعات الخاصة لذلك اذا بهالفترة بتعمل العدد صفر وخللينا نشوفه انا طار عقلي من الفرح ورحت دور على شباب قبضايات ادبيا واعلاميا ومافي مخافر براسهم واستبعدت مستحاثات البعث من المحررين بالصحف الرسمية متل الثورة والبعث وتشرين(يتبع)لبين ماقوم للحمام. 

ولله جمعت كادر محترم بتوليفة سورية من كل الاطياف بدون استثناااااااء واستأجرت بيت بشارع الباكستان وحولته لمكتب باذن من صاحبته الانسانة الحرة الشجاعة الكريمة واللي بعتبرها من مؤسسي الجريدة لشغفها بجرأة الجريدة وشعبيتها فيما بعد خلصت العدد صفر وارسلته لبشار فتح لي تلفون ولقيته عما يضحك قال لي يارجل انت هيك بتفتح على حالك جبهات وادعاءات وبتسلط عليك ناس وبياخدوك وبيجوبوك عالمحاكم جاوبته وقلت له نحن لساتنا بالرقراق ماصار شي اما بتقللي استمر او بتقولي سكرلنا عالباب؟؟ بعدين انا قلت لك مابشتغل شي بدون وثائق وتكون 100/100 جاوبني وقال لي اذا 10 بالمية منيح شو انت رئيس محكمة ؟؟ قلت بقلبي تمام ظبطت ونقشت ولله(يتبع) جهزت العدد صفر وصار خالص بقي الطباعة وهون المشكلة لانه كان معي بوقتها حوالي 17 الف دولار حصيلة توفير سنوات من الرسم بالصحف والمجلات العربية والاجنبية واقدمت على مغامرة مابعرف اذا بخسر او بطلع راس براس عالاقل وماحسبت الربح لكن سألت بوقتها شيوخ الكار بالستينات قبل البعث واحد منهم قال لي انت قريت اول شي قانون المطبوعات قلت لا ولله قال منشان هيك عامل بطل وشجاع قال هاد قانون عقوبات كل فقرة فيه مفخخة وبتوديك السجن هههههههههه قلت له خلليها تشتي فجل المهم طالع لو عدد واحد وفش قلب العالم (يتبع) بصراحة انا كنت معتمد على شعبيتي بين الناس وقلت اذا بيصير عليي شي اكيد رح الناس تفضحهم وصير حديث الناس واللي شجعني اكتر هجمة الصحافة بره لكسب سباقات صحفية معي ومع المحررين بخبر اصدار صحيفة خاصة حرة مستقلة بعد اغلاق الصحف الخاصة حينها من قبل البعث وانطبلت الدنيا بخبر الجريدة اللي سميناها الدومري .

والحقيقة لقمان ديركي المستضرط للحياة هو من اختار الاسم هههههههههه والدومري هو الشخص اللي كان يضيء المصابيح مساء قبل ظهور الكهربا ونحن كمان بالجريدة رح نضيء مساحات الظلام بالبلد وهيك كانت القصة اصدرت اول عدد بال2001 ولما نزلت الصبح لشوف العدد بالمكتبات مالقيته ولما سالت صاحب مكتبه اذا وصل له العدد قام ضحك وقال لي العدد خلص من اول مانزل الفرحة خللتني رح افقد توازني واتسندت عليه وسكتت واتبلكمت بوسته من هون وهون ورحت عالمكتب بالجريدة لقيت الشباب المحررين والفنيين وكل الكادر التحريري طاير عقلهم من الفرح وقالوا لي طبعنا 50000 نسخة ولازم نطبع حالا 25 الف نسخة اضافية وفعلا طبعنا ونفدوا كمان ياااااالهي صرت قول انا بحلم ولا بعلم اتاري الشعب قديش كان متعطش لهيك جريدة بعد تصحر اعلامي صادق من 1963 ومن هون بلشت الغيرة من الصحف الرسمية وخاصة لما قناة السي ان ان الامريكية قالت بالاخبار لقد صدرت في سورية صحيفة ناقدة ساخرة مستقلة ومن مكتب مؤلف من غرفتين وصالون وحمام مشترك قد اوقعت بصدورها كافة الصحف الرسمية التي يصرف عليها ملايين الدولارات من الاقتصاد ومن جيوب الناس (يتبع)

وانا كمان تخنتها شوي بالمقابلات ردا على انتقادات الصحف الرسمية لي وغيرتهم الشديدة من االدومري وماحققته من ارباح وبلشت هيئة الرقابة والتفتيش تحقق مع الصحف الرسمية ومدراءها بانه كيف جريدة خاصة طلعت تقريبا بالدين وحققت ارباح واوقعت صحافة صرفت الحكومة عليها الملايين وراحت نهب وسرقات وعمولات منشان هيك صار يشتموني بصحفهم وحتى التلفزيون الرسمي عمل برنامج ضدي ووصف صحيفتي بالصحافة الصفراء والمعلوم بانه كل هالطقم الاعلامي كان موجه من عميد المخابرات بهجت سليمان ( انتبهتوا عالملاحظ اللي ذكرتها اثناء زيارته لمعرضي مع بشار وقلت بانه خباها لي لبعدين ولسه الاخبار لقدام شو عملوا معي المخابرات بعلم ومعرفة وتوجيه بشار هههههههههههه( يتبع لبكرا) روحوا ناموا
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -